அசாம் மாநிலத்தின் திப்ருகர் பகுதியில், கடத்தப்பட்ட அரிய வகை டோக்காய் கெக்கோ (Tokay Gecko) பல்லிகளை வனத்துறை அதிகாரிகள் மீட்டுள்ளனர். மொத்தம் 11 பல்லிகள் மீட்கப்பட்டுள்ளன. இவை அருணாச்சலப் பிரதேசத்திலிருந்து சட்டவிரோதமாக கொண்டு வரப்பட்டன எனத் தெரியவந்துள்ளது.
ரகசிய தகவலின் அடிப்படையில், திப்ருகர் மாவட்டத்தில் செயல்பட்ட அசாம் காவல்துறையின் சிறப்புப் பணிக்குழு (STF), ஏப்ரல் 11 ஆம் தேதி மோகன்பரி பகுதியில் மேற்கொண்ட சோதனையில் இந்தப் பல்லிகளைப் பறிமுதல் செய்தது. சம்பவத்துடன் தொடர்புடைய 3 பேர் கைது செய்யப்பட்டுள்ளனர்.
ஒரு டோக்காய் கெக்கோ பல்லி சர்வதேச சந்தையில் சுமார் ரூ.60 லட்சம் மதிப்புடையதாக கூறப்படுகிறது. இதன் மதிப்பு, 11 பல்லிகளுக்காக மொத்தமாக ரூ.6.6 கோடியாகும்.
இந்த பல்லி சில ஆசிய நாடுகளில் செழிப்பின் அடையாளமாகக் கருதப்படுகிறது. மேலும், இதனுடைய உடல் பகுதி சீனாவில் ஆஸ்துமா மற்றும் புற்றுநோய் போன்ற நோய்களுக்கு மருந்தாக பயன்படுத்தப்படுகிறது. விண்வெளி ஆராய்ச்சிகளிலும் இது பயன்படுவதால், அதன் தேவை மிக அதிகமாக உள்ளது.
கடத்தல் முயற்சியை முறியடித்ததில் வனத்துறையினர் மற்றும் STF குழுவினர் முக்கியப் பங்காற்றியுள்ளனர். கைது செய்யப்பட்ட நபர்களிடம் மேலதிக விசாரணை நடைபெற்று வருகிறது.
0 Comments