பாம்பன், ஏப்ரல் 6 — இந்தியாவின் பிரதமர் நரேந்திர மோடி, தமிழர்களின் பாரம்பரியமான பட்டு வேட்டி மற்றும் சட்டை அணிந்து, ராமேஸ்வரத்தில் நடைபெற்ற பாம்பன் புதிய ரயில் பாலத்தின் திறப்பு விழாவில் சிறப்பாக கலந்து கொண்டார்.
இந்த நிகழ்வில், அவர் ராமேஸ்வரம்-தாம்பரம் இடையிலான ரயில் சேவையை கொடியசைத்து துவக்கி வைத்தார்.
முன்னதாக, இலங்கையின் அனுராதபுரத்தில் இருந்து பிரதமர் மோடி MI-17 ரக ஹெலிகாப்டரில் ராமேஸ்வரம் மண்டபம் வந்தடைந்தார். இந்த பயணத்தின் போது, வரலாற்றுப் பூர்வமான ராமர் பாலத்தைக் (ராமர் சேது) ஹெலிகாப்டரில் இருந்து அவர் தரிசித்ததும் குறிப்பிடத்தக்கது.
திறப்பு விழாவில், தமிழ்நாடு ஆளுநர் ஆர்.என். ரவி, ராமநாதபுரம் மாவட்ட ஆட்சியர் மற்றும் மத்திய இணையமைச்சர் எல். முருகன் உள்ளிட்ட பல முக்கிய பிரமுகர்கள் பிரதமருக்கு வரவேற்பளித்தனர்.
விழாவைத் தொடர்ந்து, பிரதமர் மோடி ராமநாதசுவாமி கோவிலுக்கு சென்று வழிபாடு செய்தார். பின்னர், ரூ.8,300 கோடி மதிப்பிலான பல்வேறு வளர்ச்சி திட்டங்களை தொடங்கி வைத்தார்.
பாம்பனில் அமைக்கப்பட்ட புதிய ரயில் பாலம் 2.2 கிலோமீட்டர் நீளமுடையது. ரூ.550 கோடி மதிப்பீட்டில் 2019ம் ஆண்டு தொடங்கப்பட்ட இந்த பெருந்திட்டம், 2024 இறுதியில் வெற்றிகரமாக நிறைவுற்றது. இது இந்தியாவின் முதல் செங்குத்து திறக்கக்கூடிய ரயில் பாலமாகும் என்பது பெருமைக்குரியது.
0 Comments